湯文亮：「雞，全部都係雞」

【明報專訊】最近有一隻只得一句歌詞的二次創作歌大熱，但我叫男同事唔好對着其他女士唱，更叫女同事千祈唔好唱，開心的時候百無禁忌，一定沒有問題，如果大家執著，隨時反臉都有可能，唔使我講大家都應該估到，那首歌就是「雞，全部都係雞」。


樓價回升，絕大多數評論員、分析員都大跌眼鏡，我當然亦不例外，有老友話我乜咁「雞」，我唔明白，原來佢話我水皮，樓市唔係升就係跌，咁容易估都估唔中，我當然不能夠反駁。不過，我又不擔心被人話雞，因為我是雞，全部都是雞，或者我這樣說是不對，亦有幾個人或基金預測今年樓市會上升，例如大摩則預測有5%升幅，林一鳴及汪敦敬亦能準確預測樓市上升，他們在加息陰影、供應大增，經濟環境不佳的情况下，仍然預測樓市有升幅，不能夠不佩服。


盤源缺少 造成樓市回升

雖然有評論員話有一些因素是估計不到，所以未能預測準確，例如來自內地購買力、英國脫歐等，我認為毋須找藉口來掩飾預測錯誤，基本上在內地去庫存之後，就應該知道有大量購買力從內地湧至，無論豪宅、商業大廈，甚至細價樓均有捧場客，在需求突然上升，令到那些打算賣樓的人封盤不賣，盤源缺少，造成樓價上升。


雞者 水皮也

至於英國脫歐，令人覺得美國在兩三年內不會加息，聯儲局主席耶倫亦曾經講過類似說話，其實，美國是否加息與英國脫歐無關，最主要是睇美國經濟情况，各項數據是否理想，美國政府以及人民是否能夠抵擋加息影響，所以，即使在年初時能夠預知英國脫歐，都不會預測不加息，令香港樓市上升。事實上，今年初預測樓市會下跌的人，包括在下，全部都很水皮，毋須狡辯。雞，全部都係雞，在這篇文章，雞是形容非常水皮，並不是大家平時所想的意思。


紀惠集團行政總裁

[湯文亮 敢說亮話]