11．29免費搭電車小輪

【明報專訊】過去5年，香港總商會都會以會慶為名，喺5月29日舉行免費乘坐全線電車同天星小輪兩條航線嘅「全程為您」活動，但家過咗8月中都未有聲氣。香港總商會總裁袁莎妮噚日就喺商會網站公布，今年繼續有呢項活動，但日期稍有改動，訂於11月29日（周二）舉行。覆蓋電車車身嘅廣告將於11月9日至12月6日，為期4星期穿梭港島大街小巷。佢又話，可能過去幾年免費乘車日太深入民心，發現今年5月29日有「消息」從facebook傳出宣傳總商會請市民免費搭電車，其實係「美麗的誤會」。