英領事答網民：唔會收番香港 話一國兩制運作非常好

【明報專訊】即將卸任嘅英國駐香港及澳門總領事吳若蘭，噚日喺facebook專頁同網民直播交流。社會近期熱論香港前途問題，主持人第一條問題就代網民問吳若蘭，英國會唔會收番香港呢？吳若蘭話好易答，答案係唔會。


佢話，英國喺幾十年前曾為呢個問題費煞思量，但事實上喺一國兩制下，香港屬於中國，而回歸後一國兩制亦運作得非常好（incredibly well）。


今次直播部分問題都幾尖銳，有網民直指英國應該就《中英聯合聲明》負上應負嘅責任，批評英國無做任何嘢幫香港。吳若蘭反駁話唔同意，強調英國一直堅決履行對香港嘅承諾，舉例指英國政府每半年都會交一份關於香港發展嘅報告畀國會，英國亦致力確保聲明下嘅權利同自由，喺香港受保障。


卸任在即 吳若蘭最愛薑汁撞奶

除咗正經議題，吳若蘭都不乏輕鬆一面。主持人喺直播開首，話要測試吳若蘭嘅廣東話，吳若蘭就好鬼馬以廣東話回應：「唉呀，我唔識講廣東話呀，好難講廣東話呀！」問到香港最好食嘅食物係咩，吳若蘭自言對薑汁撞奶難以抗拒，亦鍾意食蝦腸，最鍾意嘅地方就係志蓮淨苑，同喺金馬倫山上望到嘅靚景。


吳若蘭話，自己過去喺香港嘅主要工作挑戰，包括前年要留意佔領運動嘅發展，因為當時好多政治事件發生，但自己同時要應付其他工作。佢透露卸任後會返英國，從事英國同歐盟關係嘅工作。臨別在即，佢形容香港係一個好特別嘅地方，所以會好唔捨得香港。