梁美芬勁歌MV反拉布

【明報專訊】立法會候選人為咗爭取選票都要各出其謀，競逐連任九龍西議席嘅經民聯梁美芬（Priscilla），近日同街坊錄唱一首叫《反拉布》嘅歌，拍埋短片準備放上網。首歌長約1分半鐘，歌詞形容「再係咁拉布，實聽無嘢撈」，又代入街坊角色，話「我要供車供樓，仲有幾個細路」，如果繼續拉布就「遲早家都無」，更搵嚟布商拎起一塊布用鉸剪「真剪布」。


Priscilla話，呢首歌係由資深音樂人林慕德借出，自己早前向對方提到想錄一首歌講反拉布，對方二話不說答應幫手，畀Priscilla親自填詞之餘，仲參與合唱。Priscilla話首歌錄得成，係因為月初一場颱風，令自己有半日空檔，同朋友傾電話時諗到可以錄歌。佢形容近期選舉論壇吵鬧，希望市民聽完首歌「輕鬆吓、笑吓」。佢今日會將片段上載社交媒體。


黃碧雲批爭議議題無投票

至於民主黨黃碧雲噚日就喺facebook上載自己出席選舉論壇嘅短片，批評梁美芬喺多個爭議議題唔投票，唔係行公義，而係「行不義」。


九龍西其他候選名單包括吳文遠、何志光、毛孟靜、譚國僑、朱韶洪、黃毓民、林依麗、蔣麗芸、關新偉、劉小麗、游蕙禎、李泳漢、狄志遠。