唔鍾意「超級聯繫人」說法 范太：超乜嘢啫？

【明報專訊】立法會主席曾鈺成成立嘅智庫「香港願景」，不時搵嘉賓同佢對談，噚日佢就請嚟立法會前主席、全國人大常委范徐麗泰。佢兩位對特首梁振英（CY）態度係點，相信讀者都清楚，噚日范太就批評特首經常自稱「超級聯繫人」呢個說法。


話說兩人談到中港矛盾等問題時，范太話覺得下任特首應向中央解釋清楚港人內心諗法；向港人講清楚中央點諗，減低雙方隔膜。曾鈺成就話，梁振英好鍾意講「超級聯繫人」，形容香港可以做橋樑聯繫內地與外地。但范太就話「我好唔鍾意呢個名」，質疑係咪即係特首覺得自己地位超乎一切，呢種講法只係同市民拉開距離，「超乜嘢啫？你超過邊個先得㗎」。


唔講唔知，范太同曾主席已經相識超過半世紀。曾主席一開始就話當年，回憶第一次見對方，係港大某學會一個活動，當時見到一個女仔喺台上好cool，原來就係范太，又話范太2008年最後一次主持立法會嘅發言，佢都仲記得。


談到目前嘅年輕人，范太話覺得現時大學生，覺得有啲嘢社會、政府應該畀佢哋，但無做到，所以感到失望同無希望，認為做咩都無人重視，范太認為因為目前競爭比以前大，加上今日經濟已變成熟體，機會自然細咗。曾主席亦話，好多年輕人唔覺得返內地發展係出路，佢認為本土意識亦由此而來。