黃家和唔撐曾主席選特首 再撐梁？ 「真係唔知」

【明報專訊】香港政圈下半年連場選戰，十分熱鬧。不過曾為特首梁振英（CY）選舉站台嘅香港餐飲聯業協會會長黃家和（Simon）嘅心思，就唔喺香港。自言對「熱廚房」已無咩興趣嘅Simon，最近忙緊到法國歎世界，事關佢最近收購咗法國西南部最大嘅高爾夫鄉村俱樂部連酒莊，俱樂部仲有間米芝蓮星級餐廳。佢話9月1日會再飛法國，連立法會選舉都唔諗住投票喇。


Simon上屆喺選委會籌組「星火行動」，同「唐營」自由黨張宇人（Tommy）名單對撼，搞到唔少業界都猜測，今屆立法會飲食界佢會有意參戰，不過最後只係得「傘兵」伍永德挑機。


黃家和就話，見到立法會「拉布」景象已經無癮，所以無諗住出選。不過佢就話，張宇人都好驚佢會出嚟選，仲透露曾有一屆選完後，對方主動打電話過嚟話「好彩你無出來選，驚到鼻哥窿都無肉」。Simon無落場選立法會，不過年底嘅選委戰又有無興趣呢？黃家和就話未開始諗，又指未有特首候選人出來表態。


指梁做到嘢 性格有時激死人

至於今屆會唔會再撐CY，佢就長嘆一聲話，「唉……真係唔知」。Simon坦言，梁振英（CY）做到嘢，不過性格有時就激死人。但佢相信人貴在改變，話留意到CY最近笑容多咗，相信對方都學習緊改善待人。而對於最近人氣高漲嘅立法會主席曾鈺成，佢就唔多滿意，覺得曾鈺成同激進泛民一起「跟住矛盾去旅行」，仲攬頭攬頸，印象分大打折扣咁話。