10職員審批食評 靠會員申報舉報 OpenRice認分辨打手唔容易

【明報專訊】唔少香港人出外「搵食」都會參考OpenRice，見到食評中嘅笑臉同喊樣，可能都曾經質疑過食評嘅可信度。OpenRice嘅常務董事黃鳳鳴（Jan）噚日同Emily講，OpenRice有專門審批食評嘅部門，經過向會員查證及蒐證後，會篩走「打手」嘅食評。


Jan噚日向傳媒解釋，OpenRice嘅食評審批工作由約10名職員負責，佢話公司一直留意到「打手」問題，即有會員收受餐廳利益後為餐廳寫食評。Jan承認要分辨打手唔容易，目前依靠會員主動申報利益，或由其他會員或餐廳舉報有問題食評。遇到有問題嘅食評，職員會主動電郵嗰個會員了解情况，若有理據證明有關會員收受餐廳利益，可能會凍結相關戶口。


指銷售服務有列明贊助

之前OpenRice被「殿堂食家」會員公開指控造假，話收錢後畀餐廳刪除負評，Jan回應說，OpenRice的確有唔少銷售服務，包括為餐廳寫鱔稿、將餐廳嘅優惠放喺網頁當眼位置，同埋喺搜尋引擎優先列出餐廳，但統統都有清楚列明係贊助嘅資訊。


OpenRice收到餐廳反映，有第三方公司利用OpenRice嘅名義提供收費改食評嘅服務。Jan強調，公司從未提供過更改或刪除食評嘅服務，強調食評係公司最重要嘅財產，絕對唔會收錢改食評咁話。