警隊開IG獅城取經 聘fb寫手揀剩5人

【明報專訊】警隊近年好着重社交媒體，繼舊年開咗facebook之後，Emily聽聞佢哋有意搞埋Instagram，實行同網民拉近關係。遲啲警察公共關係科（PPRB）仲會派人飛去新加坡，到Instagram母公司facebook亞太區總部取經，唔知到時會唔會見到fb創辦人朱克伯格呢？


PPRB之前曾招聘「合約新媒體撰稿員」同埋「合約新媒體設計員」，幫警隊facebook寫文同拍片，其中寫手月薪高達4萬蚊，被網民形容為「筍工」。Emily聽聞吸引咗過百人申請，當中唔少都係同Emily一齊跑新聞嘅傳媒行家。警隊之前做晒面試，包括要應徵者即場寫篇帖文，家shortlist咗5個應徵者，逐一睇吓佢哋邊個接受offer，合適人選預料最快9月可以返工。


Emily聽聞份工雖然係1年合約，但做得好警隊都有意續約，仲有意向政府攞多啲資源再請人，大搞社交媒體。