九西女將雲集 麗芸自詡聲靚 梁美芬：真人同宣傳相幾似

【明報專訊】「三個女人一個墟」，立法會九龍西選區15張名單中，有7張名單排頭位嘅都係女將，辯論起嚟都幾熱鬧，佢哋噚日出席商台選舉論壇時面對主持尖銳提問，都有唔少搞笑時刻。經民聯梁美芬被問到佢嘅宣傳圖片有無P圖，美芬坦言「小執係有，大執就一定無」，又自評「真人應該都同我宣傳相都幾似」。


主持又質疑，梁美芬做咗8年議員，點解早前仲要工聯會幫手催票？佢就形容自己同工聯會超區候選人王國興喺立法會係「剪布孖寶」，所以合作宣傳，話「做大事要求同存異」。


民建聯蔣麗芸（Ann）就被問到，立法會主席曾鈺成話佢聲音入咪「刺耳」，不過Ann姐就反駁，主席所講係「個咪刺耳」，又認為「我把聲幾好聽」，好多人讚自己唱歌「入咪」。而講到特首梁振英（CY）嘅缺點，曾喺立法會為對方僭建事件護航嘅Ann姐就話，同CY其實認識唔深，「只係工作上見過面」，唔清楚其為人，應「問吓佢身邊嘅人啦」。


輪到Ann姐主場時，佢連環向3名女候選人發問，包括公民黨毛孟靜、經民聯梁美芬及民主黨黃碧雲，問佢哋知唔知道財經事務及庫務局、勞工及福利局以及創新及科技局嘅副局長係邊個？佢仲話呢個簡單問題，錫住大家，可惜3人都答唔到。


九龍西其餘候選人名單仲有吳文遠、何志光、譚國僑、朱韶洪、黃毓民、林依麗、關新偉、劉小麗、游蕙禎、李泳漢、狄志遠。超區其餘候選人名單仲有涂謹申、李慧琼、鄺俊宇、何啟明、陳琬琛、關永業、梁耀忠、周浩鼎。