學生願望包括曾鈺成做特首 當事人﹕祝成真

【明報專訊】表明願意參選下屆特首嘅立法會主席曾鈺成，噚日喺港大出席高中生活動「模擬立法會」嘅閉幕禮，同學生代表交流，亦聽吓台下幾十個學生逐一講出佢哋對香港嘅願望。有學生希望社會和平、經濟繼續發展，有人想香港有真普選。有學生就單刀直入，明言想曾主席「壓低」梁振英做下屆特首。


曾鈺成無逐一回應，但話如果所有同學嘅願望都實現，相信香港唔會比現時差，仲會比現時好，所以祝佢哋願望成真。唔知主席言下之意，包唔包括同學仔提出支持佢做特首嘅願望呢？


除此之外，幾個學生代表喺台上分享對下任特首嘅期望，有學生話唔想特首再為社會添分化，有學生認為特首唔應該畀人高高在上嘅感覺，亦有人話特首應該要堅守香港核心價值。曾主席嘅答案就無乜驚喜，笑言要「政治絕對正確」，自己希望下屆政府全力維護一國兩制，並特別維護香港呢一制，令香港市民以至中央都對香港呢一制有信心。