卿姐終著吊帶裙 找數兼拉票

【明報專訊】距離立法會選舉投票日尚有3星期，政黨各出其謀拉票。噚日多個新界東候選人都趁假日拉票，最爆嘅拉票方式，要數民主黨主席劉慧卿，佢使出絕招，著番36年前嘅吊帶裙，為黨友林卓廷拉票。


64歲嘅卿姐1980年代做過記者，曾經著吊帶裙出鏡「做扒」，令人印象深刻。卿姐年初講過，卸任議員前會著番吊帶裙出嚟見大家，噚日佢終於「找數」，以舊裙look巡迴新東為阿廷拉票，仲大笑話要去埋蘭桂坊拉票。


笑稱好環保 36年無爛到

Emily問卿姐著之前有無節食keep吓fit？卿姐馬上話：「黐線，梗係無啦！我好肥咩？」佢又話自己「環保到不得了」，36年歷史嘅吊帶裙都無爛到。


自由黨李梓敬同田北俊就喺沙田拉票，自由黨多名重量級人物包括榮譽主席周梁淑怡等，齊齊為李梓敬站台，周梁笑言自由黨嘅俊男都特別嚟支持。自由黨一眾成員仲偶遇吊帶裙卿姐，眾人握手寒暄，卿姐仲不忘話自己正喺度「找數」。


工聯會鄧家彪就長跑拉票，同團隊搞咗個「闖新東，不放棄」嘅長跑活動；新民黨容海恩就有單車巡遊拉票。


楊岳橋張超雄行孖咇

另外，公民黨楊岳橋同工黨張超雄行孖咇，一齊喺大圍舉行演說會，同市民講全民養老金同推動特殊教育法等，岳少話同超雄一齊宣傳可以話畀市民知，民主派並唔係想像中咁「狗咬狗骨」。至於支持度高企嘅岳少會唔會「過票」畀超雄，超雄就話唔會教市民投票，相信選民會聰明地去考慮投票意向，令泛民可以保住新界東6席。


另一邊廂，社民連梁國雄同人民力量陳志全都行孖咇，一齊喺大圍拉票開街站。


新界東其他候選人包括：方國珊、廖添誠、陳云根、麥嘉晋、鄭家富、葛珮帆、侯志強、范國威、陳玉娥、黃琛喻、李偲嫣、梁頌恆、梁金成、陳克勤。