煤氣公司總部慳電獲認證

【明報專訊】香港中華煤氣有限公司總部大樓成為首獲綠建環評最終鉑金級別認證嘅非住宅建築物，大樓有智能電表管理、需求控制通風嘅系統，仲有天台農莊、儲水箱同廚餘回收設施，比2012年未有相關系統時慳咗14%電，等於慳咗120萬元。


比2012年慳電14% 環評鉑金認證

位於北角的煤氣總部大樓其實係有23年歷史嘅舊式商用建築，仍獲得由香港綠色建築議會頒發「綠建環評既有建築1.2版」嘅最終鉑金級別認證。中華煤氣物業管理經理盧鑑明同Emily講，公司投放咗三四億元，由2012年開始更換舊設備，提升節能效益。大樓採用智能式管理用電，管理員可透過電腦系統實時監察耗電量，分析近500個電表嘅數據，細緻到每架升降機嘅用電量都睇到。公司員工可自由調節開燈嘅範圍同時間，例如加班時淨係開座位附近啲燈。


另外，大樓有需求通風系統，每層樓有3個二氧化碳監察器，當室內少人、二氧化碳含量低時，鮮風處理機排出少啲新鮮空氣，達到慳電效果。慳水方面，2015年比2014年嘅整體用水量下降咗近13%。