被問港交所打擊殼股 曹貴子：唔想回應

【明報專訊】由兒科醫生變成股壇活躍人士，康健國際（3886）創辦人曹貴子近年落力發展慈善事業之餘，亦經常被傳同唔少殼股扯上關係，佢噚日現身自然有人問佢點睇港交所（0388）「出招」打擊殼股，不過佢笑笑口一句「唔想回應」就閃咗啦。


旗下基金會捐錢畀教育大學

曹醫生旗下「曹貴子基金會」捐咗筆錢畀香港教育大學，大學將校內行政大樓命名為「曹貴子基金會大樓」，噚日就舉行命名典禮；曹醫生話，之前已經有捐款畀唔同項目，今年就主力資助香港教育大學，因為其他大學已經有好多人關注，加上教育大學主力培訓老師，將來可以幫助唔同學生，比只係資助個別學生嘅範圍更廣同有意義。


曹醫生亦都唔願意透露捐款金額，話「做善事係講心唔講錢」，唔想以個別捐款作為標榜。佢希望有機會參與教育大學嘅未來發展，亦唔排除日後會有更多資助項目。


email: piano@mingpao.com

[小琴密語]