旺角衝突開槍交通警 獲一哥嘉許

【明報專訊】處理旺角大衝突檢討嘅警方內部檢討委員會月初敲定嘉許名單，Emily噚日得知，4警員噚日正式獲嘉許，包括當時向天開槍的交通警員獲頒俗稱「花雞繩」嘅處長嘉許。


警方話，警務處長盧偉聰噚日喺警察總部，頒授處長嘉獎予曾參與處理年初「旺角暴亂」嘅4名人員和15個單位；讚揚佢哋當晚參與行動嘅英勇表現，無畏無懼及盡忠職守嘅精神。


Emily聽講，4個獲處長嘉許嘅警員包括3名交通警，即當日被拋擲卡板擊至倒地交警、另一保護倒地警員嘅交警，以及向天開槍嘅警員，仲有一個喝止示威者擲磚以保護同袍嘅機動部隊女警署警長。


另外15個獲處長嘉許嘅組別，包括旺角警區、機動部隊、各區衝鋒隊、快速應變部隊、有組織罪案及三合會調查科、毒品調查科，以及事後參與調查嘅商業罪案調查科等等。


至於早前面部受創嘅旺角警區警民關係組警長黃樂安，Emily所知佢會獲最高榮譽嘅特首嘉許（即紅雞繩），佢喺上月獲提名，預計最快要明年10月先獲特首正式嘉許，結果喺明年7月授勳名單一同公布。