林鄭「一拖四」 開咪講扶貧政績

【明報專訊】扶貧委員會 免費報賣8期廣告

政務司長林鄭月娥選唔選特首呢個問題，佢話大家拭目以待，但呢屆政府任期近尾聲，林鄭就好積極好願意咁向公眾推介佢主力嘅扶貧工作，據知今次好大陣仗咁，由林鄭率領4名局長同時出席電台節目，總結政府呢幾年嘅扶貧政績。扶貧委員會仲會喺免費報章賣8期廣告特刊版面，等市民認識政府嘅工作同措施。


政府以扶貧委員會名義，近月同商台合作，逢周三黃昏6點半至8點，搞咗個《人民大道在乎你》節目，之前幾集林鄭同勞工及福利局張建宗等都有登場介紹工作，亦有邀請各機構負責人同受助人分享，講老有所歸、自力更生等主題。未來幾個星期節目就講青年上游、社會共融等話題。Emily聞說，喺8月31日播出嘅壓軸節目陣容鼎盛，暫定由林鄭「一拖四」出席，包括民望高嘅食衛局長高永文、張建宗、民政事務局長劉江華，以及教育局長吳克儉，因為佢哋嘅工作範疇都同扶貧有關。


特首梁振英成日話，今屆政府主打扶貧安老工作，而林鄭就係主要負責官員，政績歸邊個唔知點計好。林鄭好上心，話政府2012年成立委員會，先檢視現有扶貧措施，繼而探討長遠政策方向，而其中一項重要工作係訂立咗「貧窮線」，等政府及各界可以對症下藥。