市民著「港人」tee被截 余若薇收趙國雄回信

【明報專訊】公民黨今年七一遊行時售賣由該黨主席余若薇以書法寫嘅「叫我香港人」T恤，點知有市民早前著住呢件tee去沙田銀禧花園探朋友，保安如臨大敵當佢可疑人物處理，余若薇上周五就事件去信長和系主席李嘉誠，噚日就收到長實執董趙國雄親自回信。


余若薇上星期五去信誠哥，質疑點解長實旗下保安公司高衛物業管理嘅保安員，刁難著住「叫我香港人」T恤嘅市民，佢喺信中提及誠哥多次表達對香港嘅深厚感情，正因為佢同誠哥一樣，都感到港人面對前所未有嘅挑戰，充滿挫敗，所以先設計呢款tee為大家打打氣。余小姐話估唔到官方同民間都出現政治審查，限制表達自由，又話如果保安決定係跟指示而作出不合理嘅待客行為，希望誠哥督促下屬馬上糾正。信件仲附有一件大碼嘅「叫我香港人」tee，希望誠哥笑納或轉送該保安。


件tee按誠哥囑咐送保安

事隔幾日，余若薇收到趙國雄回信，話誠哥將信件交畀佢處理，又解釋番當日該市民去銀禧花園嘅情况，信中提到為維持屋苑治安同住戶安全，保安員須嚴格執行訪客登記守則，或會引起部分訪客不便，希望諒解。佢強調，訪客衣著有個別字樣「純屬個人自由，不在保安範圍之內」，保安唔會干涉，亦無歧視。至於余若薇送嘅tee，趙國雄就話已按主席（即李嘉誠）囑咐送畀該名保安員。