湯文亮﹕一個字預測樓市——「升」

【明報專訊】本周六為《明報》主講我今年的最後一場樓巿講座，明天會截止報名（goo.gl/x8jeL3），有老友話我評論樓市經常大做文章，並且創造了一些不知是否是理論的理論，例如第十個人理論、逢三退一等，佢仲話，預測樓市不外乎升、跌，或者不升不跌，所以很少評論員評論樓市，或者他們根本不屑評論樓市，只不過有一些股市評論員間中客串一下。我口多反問，評論股市又如何，我相信同樓市一樣，不外乎升、跌，或者是不升不跌。


不會直線上升

老友唔等我講完，叫我用一個字來預測樓市，佢真係睇得起我，以為我有周瑜孔明咁叻，在掌心寫個「火」字，就可以火燒連環船，搞到曹操敗走赤壁。不過，要用一個字來預測樓市又絕非難事，一個字「升」，我老友聽完之後，佢個口又只得一個「O」字。


成功投資者 承受小調整避開大調整

老友又嫌過於簡單，佢又問升之後會如何，我話跌，佢再問跌之後又點，我話升。老友不滿意話這不是叫做預測，是打橫來講，我絕對同意，如果叫我用一個字來預測樓市，唔係升就係跌，升完就跌，跌完就會升，所以，少啲功力都唔可以在升跌之間作咁多嘢出嚟，老友聽完之後好似徐志摩一樣揮一揮衣袖，不帶走一片雲彩，拂袖而去。


其實，投資物業的人都知道，樓市是不會直線上升，很多時候都會出現調整，成功投資者是有準備去迎接那些幅度不大調整，亦會小心避開那些大幅度調整，因為調整幅度細，投資者很容易再重整旗鼓，如果能夠避開那些較大幅度調整，很有可能是投資者商機，所以，單以一個升字來評論樓市，始終都會被樓市吞噬。


紀惠集團行政總裁

[湯文亮 敢說亮話]