信和搞黃金海岸節

【明報專訊】對於藝術文化，信和集團一向不遺餘力，旗下黃金海岸商場、酒店及住宅今年就連續第2年搞「黃金海岸節」。聽日開始，一連3個周六日盛大舉行。除咗大型露天音樂會外，仲請咗近百位本土及國際著名藝術家表演，不單止音樂、舞蹈，仲有環保時裝展、競技接力環保挑戰賽等等。負責今次活動的信和商場推廣經理蘇蔡潔蓮話，開幕當日仲特別請來英國著名人體彩繪藝術家Carolyb Roper首度來港獻技添！

節目咁豐富，蘇太話用咗220萬宣傳同佈置，比上年加咗20萬，希望可以吸引300萬人次到場，比上次有13%升幅；營業額可以去到2000萬，比上年升超過一成啦。佢話，今年經濟好咗，首3季租戶嘅生意額都升咗唔少，所以今年續租嘅租金有雙位數字升幅，呎租去到40至100元水平，商場出租率仲歷史性去到100%添!

設蟹宴 冀酒店入住率達88%

而為咗吸引一眾嘴饞之士，黃金海岸酒店亦都喺期間，推出「千奇百蟹」非一般環球蟹宴吸客。酒店經理話，上年氣氛好好，希望今年可以帶動酒店入住率去到八成八，即係比上年增加5%。嘩！咁高興，小琴都希望佢哋可以搞多啲文化藝術活動，因為真係好開心同好有意義。