新聞類別
財經
詳情#
【明報專訊】呢排最引人注目嘅新聞，莫過於郭氏三兄弟嘅分家事件，究竟係和平分家，定係要喺法庭了斷，仍然係未知之數。連日來，只有老大郭炳湘發聲，2位弟弟都冇表過態。噚日，一班記者就去左數碼通（0315）嘅股東大會，諗住可以會一會三弟炳聯。
電盈和電合作 第4代手機網
但炳聯就繼新意網（8008）股東大會後，再一次避見傳媒，由數碼通行政總裁黎大鈞代勞。
不過，黎大鈞亦都不負記者一番心意，向記者分享發展第4代流動網絡嘅心得。電盈（0008）同和電香港（0215）組成聯盟，發展統稱第4代流動網絡LTE。
數碼通2012年先升級做LTE
電盈行政總裁艾維朗話，會喺幾個星期內公布合作計劃。當大家都好期待李氏父子嘅合作大計，點知到黎大鈞話，覺得無需要咁快拎大批銀紙去發展LTE，何况家好少手提電話可以支援到，連最受歡迎嘅iPhone都冇喇，都唔明咁快發展做咩，可能係有部分網絡商本身網絡好差，所以要急住去升級喇。數碼通就諗住去到2012年，先會升級做LTE。
黎大鈞仲話，iPhone 4賣得幾好，ARPU（每戶平均月費）下半年繼續有得升，睇住自己嘅客戶一路升，數碼通上半年業績咁好，難怪佢會咁講嘅。
報料電郵﹕piano@mingpao.com
回應 (0)
