詹培忠拍片拉票 網民建議增「潮語」版

【明報專訊】拍片宣傳喺現今網絡世代不可或缺，年近70歲、今屆重出江湖出戰港島直選嘅獨立候選人詹培忠（詹sir），近期雖然抱恙，但都抽時間拍片拉票。片段無花巧特技，賣點就係詹sir仍然中氣十足，坐喺室內講嘢1分鐘。


片段開首，詹sir先向觀眾揮手10秒，話自己已經做過5屆議員，一向本住「主持公道」嘅精神，話如果得到選民支持，一定做到「詹培忠、敢衝鋒」，為香港「講真話」。宣傳片日前喺facebook出街後，已經有約1.7萬人次睇過，有網民就建議詹sir不如拍段潮州話廣告拉票咁話。


湯家驊翻唱《一點燭光》

另一邊廂，民主思路就推出音樂片段，召集人湯家驊（Ronny）同幾個智庫成員翻唱關正傑嘅《一點燭光》，分別參選港島同新界東嘅黃梓謙同麥嘉晋亦有登場。Ronny除咗一展歌喉，仲彈結他伴奏，片段最後以Ronny嘅獨白作結，話希望香港「永遠發光」。立法會候選人名單見附圖。