料捐3000萬賀回歸20年 中總會長：瞓覺都瞓得開心點

【明報專訊】香港明年會慶祝回歸20周年，中華總商會會長楊釗話，估計中總屆時會捐出逾3000萬元，協助舉辦各種慶祝活動。楊釗笑言唔係畀人「揼心口」，而係「自動獻身」，希望回饋社會，「夜晚瞓覺都瞓得開心點」。


中總噚日舉行周年會員大會，總結過去一年工作，並成立新一屆嘅選舉委員會，為換屆作準備。中總將會喺10月換屆，楊釗話自己已做咗兩屆會長，係時候退下來，佢相信中總會有唔少人才有興趣參選會長。


對於近日財政司長曾俊華同立法會主席曾鈺成透露有意競逐明年特首選舉，楊釗話家講特首跑馬仔言之尚早，社會目前都將焦點放喺立法會選舉，相信要過埋9月立法會選舉有結果後，特首跑馬仔嘅形勢先會明朗化。