澳洲泳手暗諷服禁藥 黃國健撐孫楊﹕指控無證據

【明報專訊】中國隊游泳選手孫楊日前喺里約奧運400米自由泳決賽，輸畀澳洲對手賀頓，賽後雙方唇槍舌劍，賀頓暗諷孫楊曾經食禁藥，中國泳協就要求賀頓道歉。呢股戰火噚日仲由巴西燒到香港嘅立法會選舉論壇。


KK：若無證據 賀頓須道歉

出選九龍東嘅工聯會黃國健（KK），喺電台論壇被問到呢件事係咪反映中國人「玻璃心」，同埋澳洲方面有無需要道歉，KK就力撐孫楊，形容奧運會競爭激烈，但無證據嘅指控係唔道德。主持人之後提醒KK，話孫楊曾經因為食禁藥而被停賽，KK回應話孫楊今次獲准參賽，咁代表孫楊過到關，而賀頓如果無證據，就要道歉咁話。


工聯新丁評特首 打波作比喻

工聯會候選人成日被對手追問撐唔撐特首梁振英連任呢個問題，另一邊廂，工聯會兩名自動當選勞工界代表嘅何啟明同陸頌雄，噚日就同傳媒茶敘，雖然唔使競爭，但問題一樣要答。對於支唔支持梁振英連任，兩人都無正面回應，話要睇年尾嘅全民退保同標準工時報告理唔理想，先作決定。咁係咪唔理想就唔支持呢？佢哋就話唔可以講得咁實，揀邊個做特首要視乎勞工政策喎。


何、陸兩人都無為梁振英工作評分，佢哋以體育打比喻，形容場波一日未踢完，人人都有機會「反敗為勝」，所以現時講分數係唔公道。咁財政司長曾俊華或立法會主席曾鈺成做下屆特首又點睇呢？佢哋話都係要睇勞工政策。立法會候選人名單見附圖。