有話說﹕改善自閉 運動治療幫到手

【明報專訊】跟Mama住同一屋苑嘅陳師奶，有個仔叫津津，Mama由細睇到佢大，今年足7歲。津津外表同其他細路冇乜分別，但佢有自閉症。最記得有次Mama同佢兩母子同一部電梯，唔知點解，津津突然間發脾氣，仲喺度「撼頭埋牆」，Mama見慣世面，當然處變不驚，但電梯內嘅其他人就被津津古怪行徑嚇傻。


最近，Mama又撞到佢兩母子，見陳師奶明顯寬容咗，無以前咁苦瓜乾，原來係因為津津近排接受訓練之後，乖咗好多。陳師奶話，其實以前都有畀津津參加私營嘅「社交技巧班」，但好多時，啲職員為免家長投訴，一見細路有爭執，就會立即將佢哋分開，根本就唔能夠幫助到小朋友學習處理情緒及社交衝突。


津津半年前轉咗去香港中華基督教青年會（Chinese YMCA）參加「STEP」計劃，陳師奶發覺仔仔情緒穩定咗、少咗發脾氣，聽取指令嘅專注力亦有進步，比以前有耐性。以前玩小組遊戲，津津會好固執、死牛一面頸，但家，見佢喺課堂都願意接受小朋友更改遊戲規則，亦肯讓對方玩先。


「STEP」究竟係乜，點解咁幫到SEN學童？Mama當然唔放過任何一個八卦機會，立即打去Chinese YMCA問個究竟。該會業務發展主任吳競杰話，「STEP」其實係一個運動治療計劃，將遊戲糅合運動訓練，目的係提升SEN學童嘅專注力、身體平衡協調及社交能力。


「好多家長以為帶SEN學童上運動班，就可以加強佢哋嘅身體協調能力，但學童因為各種發展障礙，包括大小肌肉、感統、平衡有問題，根本無辦法完成動作，只會表現得好『論盡』，反而會令佢哋自尊受損，亦會出現自卑及逃避運動及社交嘅情况。」


糅合遊戲 提升身體平衡協調

因此，「STEP」計劃會先安排學童接受物理治療師或職業治療師評估，然後再按個人需要，以群體遊戲糅合唔同嘅設計動作，用循序漸進方式，幫助學童提升身體平衡協調能力，刺激及培養佢哋對運動嘅興趣。另外，運動期間，導師會有唔同指令，學童就要專注，亦因為活動以小組形式進行，有時小朋友要互相合作完成任務，就有機會訓練佢哋嘅人際關係、情緒控制。


「STEP」之前做過研究，發現學童受訓三個月後，在選擇性專注力、持續性專注力及靈敏度三方面都有明顯改善。如果家長對呢個計劃有興趣，可以打電話去2783 3481，直接搵吳競杰了解下。