奧運熱殺到 齊打體育牌 財爺回味京奧 CY談體育園

【明報專訊】梁振英﹕推動體育普及化

巴西里約奧運開幕，香港有38名運動員出戰，特首梁振英（CY）同財政司長曾俊華噚日就分別為一眾健兒打氣，CY喺調景嶺出席「全民運動日」後，喺facebook祝運動員發揮最佳水準、滿載而歸；而財爺就發表題為「全力爭勝」嘅網誌，為香港運動員打氣，但有網民就留言話，「你都要全力爭勝」。


兩名疑似下屆特首參選人同樣不忘抽水，講吓自己喺體育方面嘅政績。CY就推銷啟德體育園，話今屆政府已經決定斥資興建，以推動體育運動普及化，形容體育園係香港有史以來最大型嘅體育設施。CY趁噚日全民運動日，話走入社區，去咗調景嶺體育館探望正參與全民運動日嘅市民。


曾俊華重提設70億運動員基金

另一邊廂，財爺話自己喺幾年前嘅財政預算案，宣布成立70億元嘅「精英運動員發展基金」，而基金成立以嚟，香港全職運動員人數已經上升六成，近年喺國際賽事嘅成績亦不斷進步。


財爺又形容奧運對自己呢類體育迷係四年一度嘅「頭等大事」，話奧運帶畀佢唔少美好回憶，當中以2008年北京奧運最難忘。佢憶述當年同太太去北京睇比賽，為中國隊同香港隊運動員打氣，又同來自各地嘅觀眾一齊盡情吶喊，「心情確實激動」咁話。