3組織籲關注煙民報販權益 要求立會參選人簽約章

【明報專訊】立法會選舉在即，3個煙民、報販組織噚日開記者會，呼籲參選人關注煙民同報販權益，仲草擬咗一份約章，要求參選人簽署。社會近年被指變得撕裂，「全港報販大聯盟」主席廖社青表示同意，話煙民家庭都出現「黃絲對藍絲」嘅情况，不過無關政治立場，而係政府收窄煙民空間，令家庭撕裂，家人「食煙就唔愛你」咁話。


強調非選舉動員

全港報販大聯盟、「好煙民大聯盟」同「香港煙民權益關注組」，嚟緊會用電郵通知約千個成員以至其他煙民，介紹有邊個參選人簽署咗約章，但就強調今次唔係選舉動員或者建議投票畀邊個，亦承認現時只得一個地區直選獨立參選人簽咗。


廖社青話，家煙民同報販面臨最迫切嘅議題，係政府會放大香煙包裝上嘅警告圖片，影響報販生計之餘，亦會助長私煙魚目混珠，所以希望參選人可以保護佢哋權益。