曾鈺成：醫生朋友估CY有亞氏保加症

【明報專訊】政界唔少人都有講過，雖然識咗特首梁振英（CY）好耐，但都唔係話同佢好熟，立法會主席曾鈺成噚日同傳媒聚會，亦有談及CY，佢引述醫生朋友話，相信據CY嘅性格判斷，係有「亞氏保加症」。不過，曾主席亦形容CY上屆準備參選特首時，性格對比以前改變咗好多。


曾主席話，有個醫生朋友係研究「亞氏保加症」嘅專家，該醫生曾經同佢講，以佢嘅判斷，CY肯定有「亞氏保加症」。亞氏保加症係自閉症嘅一種，病徵包括說話平板、缺乏抑揚頓挫，行為固執、唔會主動參與群體活動等。


CY打風參觀紀念館

日前曾主席喺自由黨田北俊facebook留言回應選特首話題，話「薯片叔叔（指曾俊華）出，我梗係走夾唔抖啦！」唔少網民「讚好」；曾主席話個留言的確係佢親自寫嘅，笑言當日有朋友傳咗張寫有「如果CY下界（屆）仲係特首，我唔X叫曾鈺成！」嘅惡搞圖畀佢，佢第一個反應係覺得揀咗張佢核突嘅相，後來先知係田少貼喺facebook嘅，所以上去留言回應吓。


另一邊廂，CY噚日喺3號波懸掛期間發表網誌，介紹8月1日起5間博物館免費入場，話「偷得浮生半日閒，博物館是好去處」。CY話，呢個新政策重點不僅係為市民慳十元八塊，而係鼓勵大家多啲到博物館，為大家生活加添姿采。佢仲話噚日下午去咗參觀孫中山紀念館