葉劉選舉論壇被圍攻﹕當選議員選特首毋須辭職

【明報專訊】立法會選戰正式「開打」，新民黨葉劉淑儀噚日出席商台嘅港島區選舉論壇即被圍攻，不單被人翻舊帳，批評佢著皮草係漠視動物權益，又被香港眾志羅冠聰炮轟佢為「舔共」放棄政治原則。同場嘅論壇主持人都追問葉劉「會否當議席係機場，當選後辭職，再去選特首」，葉劉就話never say never（永不說永不）。


葉劉當場聲明當選立法會後毋須辭職也可選特首，但就無承諾唔選特首，直言「有人講過N年唔會選，結果都去咗選。世界嘅嘢never say never」。佢又話當選議員後唔會辭職。


回應穿皮草﹕係創意工業

葉劉噚日被對手針對，對於曾穿皮草，佢重申皮草業係香港傳統本土產業、創意工業，又話「皮毛」係由飼養動物所得，反對胡亂屠殺野生或瀕臨絕種動物。至於被羅冠聰質疑係咪認同政府有政治篩選、打壓不同政見人士選舉權時，葉劉回應話《基本法》保障港人有言論自由，但政治權利唔係絕對，所以有一定參選要求，亦認為參選人支持「國家領土完整」好重要，結果又惹來對手一輪炮轟。


葉劉反駁時更一度同對手疊聲，於是大嘆「羅生，你鍾意點鬧我就鬧我啦」。


對於葉劉被翻舊帳，香港毛皮業協會發聲明強調，目前所用毛皮絕大部分來自養殖場，不屬瀕危野生動物，亦不存在「活剝毛皮」嘅情况，對於有參選人發布同事實不符言論感到十分失望。立法會港島參選名單包括鄭錦滿、許智峯、葉劉淑儀、郭偉強、張國鈞、羅冠聰、司馬文、王維基、陳淑莊、沈志超、黃梓謙、劉嘉鴻、何秀蘭、詹培忠、徐子見、賴綺雯。