交友公司搞「訓練員派對」 反應差

【明報專訊】Pokémon GO 熱潮襲港，唔少公司食住個勢吸客，例如有商場開lure module（小精靈誘餌），吸引訓練員到場，不過如意算盤唔係個個打得響。有交友配對公司噚日就搞咗個「Pokémon GO訓練員派對」，但20個名額得4個人參加，活動負責人都承認「人數上係失敗」。


4人參加 「人數上係失敗」

活動負責人、「幸．匯」首席配對顧問麥耀邦（圖）話，「難得搵到個全城共同嘅話題、男女都喜歡嘅嘢一齊去做」，希望參加嘅人都可以透過分組捉精靈互相認識，加上今次活動費用全免，旨在宣傳吓公司。


佢承認活動有人甩底，「人數上係失敗」，不過噚日嚟嘅兩男兩女都認識咗，唔係完全達唔到活動目的，仲話如果遲啲都有呢啲熱潮，會再搞類似活動