蔡瑩璧出山 義務做一帶一路專員

【明報專訊】特首喺年頭嘅施政報告講足40次「一帶一路」，話要成立「一帶一路」辦公室做聯繫角色；不過一直只聞樓梯響，直到噚日政府終於正式宣布，由已退休嘅商務及經濟發展局前常任秘書長蔡瑩璧（圖）出山做一帶一路專員，仲要唔收人工。


根據政府公布，蔡璧瑩8月1號正式返工，不過佢嘅任期只係去到下年6月30號，亦即係本屆政府任期完結嗰日。做得專員人工又點計呢？政府話蔡瑩璧今次出任專員係唔受薪嘅，負責「聯繫政府各部門及社會各界」，向特首及「一帶一路」督導委員會提供建議和意見，聽落工作量都唔小，但任期唔夠一年，蔡專員可以點樣發揮就要拭目以待。


任期唔夠一年

至於任期短仲要做義工，蔡瑩璧點解肯出山呢？蔡瑩璧就回覆Emily，話喺身體仲可以嘅時候，希望可以喺一個非受薪、公職嘅崗位上，睇吓可唔可以回饋社會。佢話一帶一路係國家大政策方針，希望喺呢個國策下，為香港尋找新發展機遇。


政圈同官場耳語都話，蔡專員做過駐日內瓦經濟貿易辦事處副代表、新聞處長及商務及經濟發展局常任秘書長，對工貿同推廣都有經驗，相信可以協調政府唔同政策局、部門。