動漫節開鑼 焦點大熱VR遊戲

【明報專訊】書展嗰頭完咗，動漫節呢頭又嚟。第18屆香港動漫電玩節今日揭幕，各參展商嘅600個攤位各出其謀吸客，有參展商大打本土情懷，亦有公司引入近期大熱嘅VR（虛擬實境）遊戲。雖然大會今年講明無限量版產品賣，但仍有漫畫迷早咗46個鐘排頭位等入場。


積木品牌LEGO今次展覽用「香港昔今」做主題，請咗20個本地LEGO達人砌出機場、中環同街市等12件作品，畀入場者細味唔同年代嘅香港。香港樂高高級市場部經理岑皓祺話今次不單針對年輕客，仲希望吸引一家大細，目標人流可較上年多10%至15%。


電玩龍頭PlayStation今年就有全港最大嘅VR體驗館，佢哋嘅市場傳訊部助理總經理趙善盈話，1400個VR預約試玩籌已爆滿，預計營業額會比去年增長10%，對銷情有信心。


動漫節今日起去到8月2日（下周二），開放時間由朝早10點至晚上9點（8月2日於8點關閉），票價35元。