林依麗再選：年紀大難P圖 中出羊子自稱「美軍帶路羊」

【明報專訊】每屆立法會選舉都有啲特別嘅人參選，不過當中最堅持不懈嘅，要數仁濟醫院及保良局前總理林依麗。佢噚日第四次報名出選九龍西，仲好有恒心堅持其政綱——「包二奶刑事化」，話不滿議員咁多年來連「提案都唔敢」，質疑「一係佢哋自己有包，一係你老公包緊啦！」


林：唯一不收維穩費

今年58歲嘅林依麗話，因為年紀大，今次本身唔想參選，但覺得香港太亂，都要企出嚟，話「家必須係要考慮林依麗嘅時候」。九龍西選區雲集好多女性參選人，4個女議員（梁美芬、黃碧雲、蔣麗芸、毛孟靜）都競逐連任，又有青年新政嘅游蕙禎，早前就有不止一個參選人嘅單張，被指執相執得太勁，惹來批評。對於同區女候選人宣傳品有「P圖」嫌疑，林依麗就話自己年紀大，「P都無得P啦」，又話P圖係「呃選民」，但「港豬要畀人呃，我都無辦法」。


不過佢今次政綱都有搞吓新意思，多咗好多本土元素，例如減少購入東江水、取消普教中、增加「非」本地大學生學費等。佢競選口號中又聲稱自己係「唯一不收維穩費」嘅候選人。


而曾喺區選中言行出位、派出性感女郎拉票嘅城邦派中出羊子，噚日都報名參選新界西，本身個名已經夠特別嘅佢，報名表上又填上別名「美軍帶路羊」。佢講到明要大範圍搞港獨，勾結外國勢力，唔知又能否獲得選管會確認呢？