工聯會義工幫眾志派傳單

【明報專訊】選舉將近，政黨密密擺街站拉票，但可能政黨花多眼亂，發生咗義工「幫錯黨」嘅事。香港眾志秘書長黃之鋒噚日就喺fb透露工聯會義工去幫香港眾志派傳單嘅事。


普通話男生擺烏龍 派足1個鐘

黃之鋒話，之前去堅尼地城擺街站，有個講普通話嘅後生仔嚟問﹕「請問這裏是不是可以幫忙發單張喔？」之鋒覺得個後生仔有啲生面口，而且香港眾志亦無講普通話嘅義工，但見個後生仔一片好心，所以無理由拒絕佢。


點知其間工聯會嚟咗同一位置派單張，個後生仔不斷望住工聯會，之鋒覺得有少少唔對路，擔心後生仔係對家派來嘅人，唔知想收風報料定做咩。個後生仔幫咗香港眾志一個鐘後，變咗拎住工聯會嘅單張。之鋒去問工聯會街站負責人到底發生咩事，先知原來個後生仔係幫工聯會嘅，佢自己搞錯咗去幫眾志。


之鋒話，工聯會街站負責人同佢講：「唔好意思呀，我哋無心搶你啲人，只不過呢個後生仔個樣咁似學生，我都以為佢係你哋嘅義工，點知原來佢本身真係幫工聯會手㗎……」無論如何，之鋒都多謝呢個後生仔幫香港眾志派咗一個鐘單張。