車房變豪宅 政府繼續「唔理住」

【明報專訊】本報上月報道咗淺水灣道有人將車房改建為豪宅，並不斷轉售，車房豪宅售價7年間由30萬升至518萬元，結果引來各方迴響。有多名受影響嘅居民及大廈業主立案法團，過去20多年曾多次去信各政府部門求助，至近月他們收到屋宇署嘅回覆，稱由於僭建物未有影響樓宇結構及妨礙走火通道，故唔屬於須優先取締嘅違建工程。

昨日立法會工程界議員何鍾泰向政府查詢呢件事，獲發展局長林鄭月娥書面答覆。政府嘅回應篇幅好長，但重點都係話，處理更改用途如處理僭建物一樣，對生命及財產構成嚴重威脅，或者對環境造成嚴重滋擾嘅個案，屋宇署會優先處理。小琴認為，這個回應潛台詞係對生命、財產、環境無嚴重威脅嘅個案，暫時唔會處理。唔知眾多納稅人對呢個回應，又收唔收貨呢？

小琴認為，有啲事唔係對生命財產有冇威脅嘅問題，其實可以改作住宅嘅車房唔少，只不過係有啲市民奉公守法，有啲市民較大膽。若果較大膽嘅市民改車房後，可以取得10倍以上嘅利潤，呢個社會仲係唔係公平？

何議員亦問到，點解屋宇署無對果啲車房改住宅嘅個案，採取行動。政府答得更妙，話不知道何議員問緊邊啲個案，所以只能提供一個概括嘅回應咁話。