【明報專訊】講起寶麗萊「即影即有」相機，相信大家都有唔少回憶。面對數碼相機嘅衝擊，過去寶麗萊曾經面臨破產，又幾度轉手。不過，近年寶麗萊動作頻頻，推出多款新型號嘅「即影即有」相機，噚日仲宣布，拍住香港中型廠家升岡國際（0485）雙雙發展，由升岡負責係北美做「即影即有」相機獨家分銷商。升岡主席劉錫康話，預計寶麗萊相機可以係北美每年賣成2億美元，仲可能會攜手開拓歐洲同中國市場，實行由港商撐起寶麗萊相機重生。
回想小琴年輕嘅時候，拎住部寶麗萊相機都不知幾威水，唔使等曬相，就可以印張相同朋友分享，但數碼相機出現，令到寶麗萊相機變咗做「雞肋」。
之但係，升岡主席劉錫康就對寶麗萊好有信心，佢話，預計2011年北美有40億美元嘅相機市場，相信寶麗萊可以有5%的市佔率，所以每年銷售額應有2億美元，相當於升岡去年的營業額的4倍以上。劉錫康亦都話，寶麗萊相機的毛利率有30幾%，畀家集團嘅電器產品足足高10多個百分點。
或開拓歐洲中國市場
劉錫康仲話，升岡係北美多年嘅分銷網絡，相信應該可以幫到寶麗萊，今次雙方簽訂5年的合件協議，升岡亦會幫手開發新產品，家亦同寶麗萊傾緊合作開拓歐洲同中國市場，希望6至9個月後有決定。其實早係今年上半年，升岡已經睇中寶麗萊呢個品牌，以自家生產的平板電視、DVD機等，貼上寶麗萊品牌係北美市場銷售。
回說寶麗萊呢個品牌，都真係幾傳奇，寶麗萊係80年代憑住「即影即有」專利技術，曾經風行一時，寶麗萊當年亦曾經控告柯達侵權，成功阻止對方進入「即影即有」市場。1991年寶麗萊嘅收入高達30億美元，可惜最後公司抵抗不了數碼大潮流，2001年轉型失敗終告破產。
請Lady Gaga做代言人兼設計
輾轉之下寶麗萊係2009年由另一美國公司購得，重新包裝招牌相機產品，更搵到今年大紅明星Lady Gaga做代言人同設計。劉錫康話，喺下年初將會有Gaga有份設計嘅新產品推出，主攻年輕人市場。寶麗萊今次能否重拾昔日光輝，老套啲都要講句「拭目以待」喇！
報料電郵﹕piano@mingpao.com
