曾俊華讚煲呔行政一流 私交甚少

【明報專訊】財政司長曾俊華一直被視為前特首曾蔭權嘅愛將，除咗獲鼓勵回港投考政務主任（AO），財爺仲大讚舊老細「喺行政上係一流」，形容與煲呔共事時合作愉快，佢亦願意聆聽他人意見。


對葉劉批評煲呔感奇怪

曾俊華接受商台節目《雲常開》訪問，佢話做AO第一份工係沙田貿易署助理政務專員，上司就係時任沙田政務專員曾蔭權，當時兩人合作非常愉快，至後來煲呔做特首，又搵佢做特首辦主任。早前新民黨主席葉劉淑儀批評煲呔做特首係對香港造成好大傷害，所以自己要返嚟救香港，曾俊華話對葉劉嘅言論感到奇怪，並大讚煲呔，「當時我長時間都睇唔到有人嘅（行政）工作比佢好，係一流嘅，佢也對香港有心」。


財爺話，行政係指推動政策執行嘅過程同程序，「因為要尊重制度，尊重核心價值」，又話如果煲呔主政時有不足，佢都有責任。不過，財爺話同煲呔關係都係體現喺工作上，因兩人興趣唔同，私交甚少，最近一次見面係七一回歸紀念日。


肥彭世故值得借鏡

財爺仲做過前港督彭定康嘅私人秘書，佢形容對方係「世故（sophisticated）嘅政客」，喺工作以外，都有時間打網球、食蛋撻，「呢個係政客與公務員嘅分別，要達到咩目的呢？係咪感覺比實際事情更重要呢？佢（彭）有啲地方係可以參考」。