捉精靈要知 駐軍：軍營係禁區

【明報專訊】Pokémon GO熱潮令全港瘋狂，公園及海旁等地標都成為「精靈訓練員」嘅聚腳地，但唔係每處地方都入得去捉精靈㗎。解放軍駐港部隊噚日話，所有軍營都係受香港法律保護嘅軍事禁區，未得駐軍最高指揮官同意或授權，任何人不得進入軍事禁區。


警務處長盧偉聰噚日亦開腔，要求各警區留意小精靈經常出沒嘅地方會唔會有太多人聚集，又會安排人手維持治安，警方嘅App更溫馨提示，叫人行路咪掛住捉精靈，更加唔好誤闖禁區，特別係警署。


但有唔少商家借遊戲開拓商機，例如有商場話喺今日一連3日，用Lure Module（誘餌）令小精靈現身，仲送現金券畀最先捉到指定小精靈嘅人。亦有提供出租車嘅商戶推出「包車」服務，等市民可以坐車到指定地點捉精靈。