赴京交流 劉江華同800港青冒雨睇升旗

【明報專訊】內地唔少地區近日大雨，又有水災，而目前都有唔少香港青年去咗內地交流同實習，民政事務局長劉江華就同香港14個制服團體800人去咗北京交流，為咗體會愛國情懷，佢哋噚日凌晨3點鐘就要起身，然後趕去天安門睇升旗儀式，其間仲落大雨。


另外，8間大專院校學生透過香港青年聯會及其他機構合作舉辦嘅計劃，去到內地多個城市實習6周，人數達300。據知，部分學生獲派到故宮、國家博物館及宋慶齡故居等重點文化單位實習，其中一名識法文嘅學生，仲有份參加博物館同法國羅浮宮博物館嘅合作項目，所以都好興奮。


至於上京嘅女童軍，噚日睇住升旗，今日就會去內蒙古交流，行程相當豐富。


國家副主席李源潮噚日喺人民大會堂接見香港青年，佢話香港回歸19年嘅實踐證明，一國兩制同基本法得到普遍擁護和國際社會廣泛讚譽。佢呼籲香港青年繼承中華民族愛國傳統，「從內心熱愛我們的國家和民族」，要全面準確理解一國兩制，並要把握時代機遇，開創香港美好未來。