少年財爺兩個月睇晒兒童部圖書

【明報專訊】一年一度書展今午閉幕，財爺曾俊華噚日就專程去青協攤位，同年輕人分享睇書心得。原來財爺兒時嘅睇書速度，拍得住自言月覽30本書或雜誌嘅教育局長吳克儉，因為財爺喺分享會話，自己十三四歲時移居美國，當時暑期生活唔算豐富，自己就同3個細佬妹去圖書館，4個人喺兩個月之內，睇晒圖書館兒童部所有圖書。


推介錢學森傳記

財爺噚日喺青協攤位分享咗10分鐘就離開，無逛到其他攤位，亦無買書，名副其實係旋風式打卡。佢喺分享會形容，當時兩個月睇咁多書，令自己得益不小，因為剛剛移民，對英文認識唔深，所以睇完書之後，自己嘅英文水平進步咗好多。


財爺噚日推介張純如寫嘅中國科學家錢學森傳記Thread of the Silkworm，鼓勵年輕人要睇書擴闊視野，適應每日轉變嘅世界。