「鼠王芬」捉鼠 鴨脷洲有鴨捉 政界邊拉票邊捉精靈

【明報專訊】風靡全球嘅手機遊戲「Pokémon GO」噚日喺香港上架，全城掀起捉小精靈熱潮，喺條街望一望，總有一兩個人耷低頭密密捉，就連政界都有議員同政助加入成為「精靈訓練員」，周圍去捉小精靈。唔少競逐連任同參選立法會嘅議員擺街站同時，都不忘捉小精靈，簡直貫徹精靈訓練員嘅精神「日夜鍛煉去取勝」。


被網民稱呼做「鼠王芬」嘅經民聯立法會議員梁美芬，雖然忙於九龍西選舉拉票工作，但都去捉小精靈，仲要捉到鼠外形嘅「小哥達」，難怪梁美芬自嘲「鼠王係捉鼠專家」。競逐連任嘅資訊科技界立法會議員莫乃光，喺九龍塘派工作報告時就見到車厘龜。


「白鴿」「小蟲」陪開街站

參選港島嘅工聯會吳秋北就話，幾忙都要抽時間陪個女玩捉小精靈，仲話周圍都有「白鴿」、「小蟲」同「蝙蝠」，「應該有好幾隻陪我做街站」。不過，吳秋北提醒大家玩時玩，要睇路同小心撞柱，最重要安全第一。


參選批發及零售界嘅民主黨南區區議員區諾軒，就分享鴨脷洲精靈捕捉報告，同大家講精靈出沒地點。佢自己都捉到唔少，包括「火葱鴨」，仲話「鴨脷洲真係有鴨捉」。


已報名參加九龍西直選嘅名單另包括譚國僑、狄志遠、游蕙禎、黃碧雲、劉小麗、蔣麗芸、李泳漢、朱韶洪，以及毛孟靜；已報名參選港島區直選嘅名單仲有鄭錦滿、許智峯、葉劉淑儀、張國鈞、羅冠聰、司馬文、王維基、陳淑莊、沈志超、黃梓謙；自由黨邵家輝亦已報名參選批發及零售界。