立會議員發言 曾鈺成最討厭道具「爆肚」

【明報專訊】做咗8年立法會主席嘅曾鈺成將退下火線，回顧議會生涯，曾主席話做主席係好高嘅榮譽同好大享受，而佢19年議會生涯中，大部分時間亦都好享受。不過，辯才了得嘅佢就慨嘆有啲議員唔認真對待辯論，批評近年議會辯論質素下降，形容有啲議員唔認真看待辯論，跟稿讀到完場，而且一聽就知道發言稿唔係出自嗰個議員手筆。


曾主席又話，有啲議員鍾意「爆肚」考急才，甚至發言時先講明自己原本唔想講嘢，佢表明幾厭惡呢種講法，認為即使議員互相唇槍舌劍，都要「言之有物」、要有準備，唔係抵唔住氣就可以互鬧。


另一樣曾主席最討厭嘅就係道具。佢話議會內應用發言去說服別人，花心思喺道具上唔會有高質素嘅辯論，亦唔會被記錄喺會議紀錄中。佢笑指社民連「長毛」梁國雄嘅辦事處中，最重要部門就係道具部。


讚毓民發言準備足

雖然曾主席批議員辯論質素下降，但佢就特別點名稱讚獨立議員黃毓民，話雖然唔贊同對方觀點同部分作風，認為對方每次發言都開口鬧人，但準備充足，講稿亦有為引述嘅說話加上「附註」先引經據典，認為其發言質素係眾議員中最高，自己都好鍾意聽對方發言咁話。