勉學生領袖爭中間派支持 石永泰：得師奶者得天下

【明報專訊】大律師公會前主席石永泰係一個貼地嘅「高登仔」，對時下年輕人都有啲了解。石大狀話，家好多學生領袖唔知道乜嘢係和而不同，只知道「唔啱就郁你」，勸勉學生領袖們唔好只係「自high（自我感覺良好）」，要爭取中間市民嘅支持，仲特別提醒後生仔「得師奶者得天下」。


嘆學生一唔啱就「開拖」

石大狀喺DBC節目《最好的時光》接受訪問時提到，自己平日同政見唔同嘅朋友討論政治，「大家會好激動咁去討論，但講完就無事」，但好多時學生領袖都做唔到，認為你唔啱就會「開拖」。


石大狀又話，勇武嘅代價係「令公眾對你有抗拒」，強調最重要係要說服中間派「一班可被說服嘅人」，呼籲年輕人要了解一般人嘅想法，「叫你去馬嘅人係唔需要你說服」。石大狀指「得師奶者得天下」，如果爭取唔到一般中間派市民支持，最終只可以守住基本盤，作用不大。佢又笑言「師奶」唔係負面，自稱「我都係一個男性師奶，得閒去睇唔同嘅嘢」。