嘉賓一提參選人 須插嘴補充 為選舉公平 蘇敬恒被迫「拉布」

【明報專訊】立法會選舉進入提名期，電子傳媒處理參選人時都比較小心，以免觸犯法例。噚日港台節目《城市論壇》討論選管會要求參選人簽署「確認書」，請嘅嘉賓無參選人，但主持人蘇敬恆都格外小心，一聽到有人提及參選人名稱，都要立即「戴頭盔」，打斷討論環節，讀番晒相關界別地區其他已報名參選人嘅名。


梁天琦被兩度提起

話說講到確認書，中大學生會會長周竪峰發言時就提到本土民主前線嘅參選人梁天琦，蘇敬恆就喺佢發言後立即插嘴話，梁天琦已報名參選，並隨即讀出水蛇春咁長嘅新界東其他參選名單，仲再三提醒所有人發言時，避免提及立法會參選人個名，以免又要浪費時間讀埋其他名單。


不過唔係所有人都咁聽話，保衛香港運動嘅傅振中台下發言時，就批評梁天琦有份參加大年初一晚嘅旺角大衝突，結果蘇敬恆再打斷佢，形容一提到參選人個名，佢就要好反高潮咁讀番其他參選名單，無奈示範「拉布」喎。