中遠停運魚翅 功效抵10航空公司承諾

【明報專訊】全球其中一間大型船公司「中國遠洋海運集團有限公司（中遠）」 發表「停運魚翅」聲明，話集團會實施「無魚翅」運輸政策，透過實施更嚴密嘅監測同規管制度，確保旗下所有船舶唔會運送任何魚翅相關產品。


「野生救援」批FedEx

中遠集團董事及總經理萬敏日前發信畀一直關注瀕危野生動物嘅「野生救援」，宣布集團實施「無魚翅」運輸政策。香港野生救援野生動物項目主任Alex Hofford話，中遠願意為守護海洋生態負上責任。野生救援指現時已有17間船運公司同34間航空公司作出「無魚翅」承諾，但點名指經過多番努力游說同施壓，美國跨國企業FedEx聯邦快遞仍對大眾「無魚翅」訴求無動於中。


據統計處數據，2010至2015年間魚翅入口香港嘅數量下降42%，由11,000噸減至6,300噸。野生救援話，中遠喺全球遠洋裝箱運輸貿易嘅市場佔用率接近8％，估計今次中遠宣布「無翅」政策，功效大概相等於至少10間航空公司作出同樣嘅守護鯊魚承諾。