葉劉立選提名 粒粒皆星

【明報專訊】參加直選嘅立法會參選人，需要提交該區100個選民嘅提名，通常泛民參選人會選擇落區，搵地區街坊攞提名，不過新民黨主席葉劉淑儀嘅提名就有唔少政界人士，噚日佢就喺facebook撰文，感謝得到唔少行政會議、立法會內唔同派別人士嘅提名。葉劉話，行會同事查史美倫、周松崗、李國章、廖長城、林健鋒、羅范椒芬、張志剛都有提名佢，認真唔簡單。


立法會方面，葉太就攞到廖長江、謝偉銓、姚思榮、吳亮星、陳健波、馬逢國、田北辰、張華峰、石禮謙、謝偉俊嘅提名，佢又話感謝中西區區議會主席葉永成、灣仔區議會主席吳錦津，同埋多個區議員提名或支持佢。唔知葉太咁樣曬提名，係咪希望呢班政界明星都可以幫佢吸更多選民支持？


漏睇選管處信函 愛女失選民資格

不過，葉太未選就已肯定流失咗一張鐵票，皆因葉太嘅愛女Cynthia已經喺選民名冊上被剔除，葉太話早前選舉事務處抽樣向選民發信，要求對方回覆核實地址，但Cynthia喺美國讀書，忽略咗封信，返港之後一查，先發現已被篩走，葉太感到非常可惜。