臨別抽水 「旅行唔係好修行」 大輝薦書吳克儉 《工作好修行》

【明報專訊】立法會選舉將近，唔少議員都趁機出書谷人氣。不時講佛偈、人稱「大師」嘅立法會議員林大輝，噚日喺傳媒告別午宴中，都有為一眾行家精心準備咗書做禮物，不過唔係大輝出書，而係佢自己前日去書展揀嘅聖嚴法師禪修書，包括《叛逆中年》、《帶著禪心去上班》等。而曾經做過教育事務委員會主席嘅大輝，對教育局長吳克儉「念念不忘」，話要推薦一本《工作好修行》畀對方，「旅行唔係好修行，工作先係」，暗嘲對方早排遊日本缺席TSA公聽會。行家又叫大輝推薦一本畀特首梁振英（CY），不過佢就話無書啱特首，因為睇書嘅人要有包容之心喎。


稱無書啱特首 「睇書要包容之心」

其實大輝退下火線一身輕，佢話一早買好機票飛北京，去睇曼聯對曼城嘅季前賽兼探老朋友，所以連廠商會副會長吳永嘉星期一報名參選，佢都唔會出席。


身兼沙田足球隊班主嘅佢就話，正籌備緊8月中幫南華會搞青訓，真係好多節目。不過佢話雖然唔做議員，仍然會好關心政圈。一向搞鬼嘅佢話，前排遇到民建聯「粗口大狀」馬恩國，鼓勵對方去馬選法律界，免得泛民郭榮鏗自動當選，又可以令選舉氣氛輕鬆啲，佢透露馬恩國當時話會「慎重考慮」。