公開梁耀忠提名表 陳國強驚見好兄弟

【明報專訊】民主派已有多支名單報名參選超級區議會議席，而獨立嘅沙田區議員陳國強亦好希望湊夠提名，趕尾班車報名參選，不過由於泛民區議員數目始終唔多，要參選有一定難度。早前街工梁耀忠報名參選「超區」時，就未肯公開所有提名佢嘅區議員。陳國強噚日就喺facebook公開3張阿忠嘅提名表，話提名阿忠嘅，「竟有一路拍心口支持我的好兄弟」。


阿忠當日手持17個提名報名（參選要有15名區議員提名），其中9個係工黨、街工成員，但其餘8人佢就不便公開。而根據陳國強上載阿忠嘅提名表，可見阿忠仲獲得區議員譚香文、麥業成、古桂耀、王振星、杜嘉倫、麥潤培、蘇冠聰同徐子見8人提名。


陳國強話希望有一兩個人可以撤走對阿忠嘅提名，相信此舉對阿忠入閘絕無影響。雖然陳國強仍然好想出戰超區，但有地區人士估計，佢最終或會循新東出選，因為呢排陳國強不時有「正義行動」街站，大部分時間都係喺新東出沒。


麥潤培噚晚就喺fb回應話，要畀票陳國強有前設，包括其他提名唔可以係建制派、對方至少有13票等。佢批評陳國強「由頭到尾都冇13人，仲公開話有13票」。