幫過共和黨助選 藝人李泳漢選九西

【明報專訊】立法會選舉提名期展開，除咗政黨人士，亦有唔少獨立人士報名參選，好似資深藝人李家鼎嘅大仔李泳漢（圖），噚日就伙拍前泛民人士符偉樂一齊報名參選九龍西。


Emily噚日未能聯絡李泳漢，但就搵到符偉樂問個究竟。符話佢2009年時處理法團事宜認識李泳漢，對方一直對政治有興趣，而李泳漢喺美國讀政治之餘亦曾為共和黨助選，又話李曾參與佔領，不滿樓價高未能置業等，所以早幾個星期同李傾開，認為對方既然不滿政府政策，不如參選。而符自己喺政圈、擔任議員助理逾20年，都有一定認識，所以都「幫吓手」。


選舉經費方面，符偉樂坦言李泳漢剛為人父都無乜錢，所以為對方籌咗十幾萬，仲要籌多啲；而自己有親戚做印刷廠，對方願意「有拖無欠」咁幫佢印單張。


曾稱有天眼通 阿嬌係前世老婆

李泳漢童星出身，早年曾自稱有「天眼通」，睇到藝人鍾欣潼（阿嬌）係佢前世老婆等，今年初同圈外人結婚，剛剛做老竇。翻查資料，李泳漢曾經加入人民力量，2011年時報名參選區議會，惟最後因家庭問題退選。