青少年軍事營 學生話唔怕被「洗腦」

【明報專訊】由董太趙洪娉成立嘅羣力資源中心，近年每年都同「解放軍駐港部隊」同教育局搞「香港青少年軍事夏令營」，今年加咗名額，由舊年260個加到500個。一班學員噚日一早喺新圍軍營參加開幕禮，個個著住藍色迷彩軍服喺操場步操、聽開幕同宣誓，大熱天時都咪話唔辛苦。不過，有啲學員話入嚟就係為咗感受刻苦，唔想枉過暑假。


名額260增至500

下年考文憑試嘅梁同學話，自細喺電視機入面見唔少軍事場面，一直都想多啲了解軍人，雖然嚟緊要補課，但趁空檔參加吓軍營，圓願之餘又可以學習刻苦忍耐。怕唔怕被人貼上「洗腦」標籤？佢話係自己決定參加，唔會理人點講。另一學員林同學就話洗唔洗腦都係睇自己嘅啫，佢話港獨問題佢平時都有思考過，但話軍事營唔關政治事，唔多講喇。


點都好，入營的確要刻苦忍耐㗎，事關15日完全唔可以用電話，每朝6點起身，夜晚10點熄燈，對城市人來講真係唔易。不過，營入面要學射擊、拳術，又參觀海軍基地、聽吓德育講座，學吓步操，今次入去嘅大約500個學員應該都無乜時間玩啦！