馬錦星退休不入熱廚房 自認果粉

【明報專訊】現年63歲嘅香港科技園公司行政總裁馬錦星（圖），將於周四（21日）任期屆滿後退休。馬錦星日前接受訪問，被多番追問未來路向，但佢話年紀大，想享受退休生活，強調唔會再打工，最多喺大學教吓書。咁如果獲邀請出任下屆政府問責官員，會唔會接受呢？馬錦星即時耍手擰頭，話自己唔係政治人才，唔適合做官。


工作無憾 家庭抱憾

馬錦星做咗科技園CEO只有3年幾，佢話工作上無憾，但對家人就有遺憾，原因係佢媽媽去年10月過身，當時佢正埋首於科學園逾百億元擴充計劃之中，陪媽媽嘅時間少咗，講嘅時候仲眼濕濕。


馬錦星接受訪問時戴咗隻Apple Watch，佢自爆係蘋果粉絲，又向記者推薦蘋果總設計師Jonathan Ive嘅書Jony Ive: The Genius Behind Apple's Greatest Products。馬錦星話，佢固然鍾意蘋果嘅iPhone同iPad，但最欣賞嘅反而係背後應用嘅技術，包括將整塊實心鋁合金挖空作為機殼，將新科技融入產品，為產品帶來突破。