主題導賞電車 賀建築師學會60歲

【明報專訊】香港建築師學會為慶祝創會60周年，特別喺今個暑假設計咗兩款以「築動香港六十載」為主題嘅電車。其中一架車身用鳥瞰角度展示街道同建築群嘅獨特城市景觀，又用相對鮮明嘅橙白色調，展示香港建築活力一面，車身仲印有一啲具代表性嘅港式標誌，例如招牌同簷篷等。


學會噚日邀請咗香港明愛同「陳校長免費補習天地」大約40個基層學生，參加電車導賞團，學生們一邊搭電車，一邊聽香港建築中心雷冠源建築師講解港島區嘅城市變遷、建築特色同電車發展。


基層學生游走地標領略港味

導賞團路線途經西營盤、中環、灣仔及跑馬地等。當電車途經上環海味街一帶時，雷冠源就問學生聞唔聞到陣味，又話感受一個地區有時靠嗅覺就分辨得到，隨即又講解海味街嘅歷史及當區居民嘅生活。


參加導賞團嘅17歲學生Jilly，兩年前由內地來港，家住西環，佢話對香港電車歷史唔算好熟悉，平日比較多搭港鐵。但佢參加完導賞團就覺得電車係重要嘅交通工具，盛載市民回憶，好值得懷念同保留。呢兩架主題電車會喺7月15日起至8月11日游走港島，大家搭電車時可以留意吓。